تخيلي عقوبة فجائية، حد، فرد، سخيف متسلط طلع في دماغه يحرق بيوت ألف واحد ويرميهم بعيالهم وبهايمهم في الشارع.
صحيح الفلاحين لا كان عندهم ورق مهم ولا فلوس ولا عفش قد كدة، والبيت الطين بيتبني ف اسبوع. بس دا كل حاجة عندهم.
بفتكر جدي عبد الحليم الله يرحمه وهو بيقول: بيت النفر مننا أغلى حاجة فيه الحَب، و عِرق السقف، والعيّل
دا طبعا لأنه كان مِسلّم بديهيا بإن عَرض الست متصان
"زِج زِج" عرض مسرحي وثائقي مصري ثري ومُشَرّف عن حادث حرق نزلة الشوبك جيزة. حضرت سهرة من ليالي إعداده بألم وأمانة واهتمام مع مخرجته المميزة الشابة ليلى سليمان، خصوصا أن الحادث معظم وثائقه مدونة بالانجليزية في الخارجية البريطانية أثناء المحاكمات العسكرية ومفيش مقابل مصري بالعربي لها هنا.
التحقيقات تتضمن شهادات نسائية بالاغتصاب، والمترجم كان مش بينقل كل الكلام بالضبط، نحررة وغيرة وكدة، ولما استلمنا نسختنا العربي خفيناها بردو نحررة وغيرة، فا ضيعنا كتير من حق الستات دول رغم شجاعتهن ومطالبتهن بعقوبة الجنود. على النقيض حادث دنشواي أخد حقه في الشهرة بيننا كمصريين، وعملنا منه ملاحم، وما سمعناش عن ستات شهدت باغتصابهن. أكيد كان في وسكتوا، او اتكلموا وخفينا الجزء دا من الكتب كالعادة.
الشهادات مذكورة ف الكتاب الأبيض، اللي خده سعد زغلول ووفد مصر لباريس في مؤتمر الصلح مطالبًا بنهاية الاستعمار في مصر، الكتاب معظمه اختفى. بعووون الله ضيعناه. 
